Minangkabau

Cinto Rido Si Anak Lado Indak Sapadeh Lado

Cinto Rido Si Anak Lado Indak Sapadeh Lado – Bola basket nan sadang malantun ka kian ka mari maikuik an garak tangan padusi tangguang nan dari tadi asyik barabuik jo balari. Suaro pakiak panonton nan buncah mamacah suasana wakatu itu.

Walaupun hari ko lago basket remaja padusi, tapi indak kalah sero jo remaja kilaki. Tu dek karano ka ahlian nyo nan mambuek panonton tapakiak-pakiak. Ta utamo anak-anak kilaki nan ado di barando panonton.

Ado surang padusi nan barambuik panjang bakabek sadang ba usaho mambaok bola ka riang lawan. Sarangan dari tim lawan tibo batubi-tubi, tapi dek usaho nan kareh tadi juo akhianyo masuk juolah bola bulek tu ka riang lawan nan mambuek padusi babadan tinggi gadang tu tasungkua.

Namo padusi tu Melisa. Melisa gadih rancak nan ado di sakolah tu. Banyak anak kilaki nan suko ka Melisa. Salain rancak, inyo ba prestasi pulo alias santiang di sakola tu. Apo lai pandai lo bamain basket.

Melisa di bao dek Rido ka lua lapangan.

“Lai ndak ba-a Mel?” tanyo Rido ka Melisa.

“Indak ba-a do Rido, sakik saketek jo nyo,” kecek Melisa nan sadang diubekan lukonyo dek Rido.

“Mangkonyo kalau main tu elok-elok, ba-a lo bantuaknyo padusi banyak bakeh luko di badannyo,” kecek Rido nan paratian bana ka Melisako. 

Melisa marunguik mandanga kecek Rido nan paratian ka inyo.

“Kalau Mel banyak luko, tu Rido ndak suko ka Mel lai?”, tanyo Melisa ka Rido.

“Indak, Rido cuma ma ingek an Mel se nyo, Bia labiah elok-elok main,” sambia malakek an palampok luko ka Melisa.

Lah sudah Rido manolong Melisa ma agiah ubek sirah ka lukonyo, Melisa balari mandakek ka wasit manando an kalau lago basket ko bisa di dilanjuik an baliak.

Rido tu pole Melisa. Urangnyo paratian ka Melisa. Walaupun badannyo agak bondek saketek dari Melisa, tapi indak jadi pambateh cintonyo ka Rido. Banyak laki-laki nan busuak hati ka Rido. Ba-a kok bisa Rido tu jadi polenyo Melisa. Padohal Rido tu agak buruak sakatiak alias dak coga-coga bana, dak lo tinggi-tinggi bana do.

Ado sakali sangkek tu, kawan salokal Melisa ko, Ari namonyo. Lah babagai caro dilakuan dek si Ari tu. Tapi cintonyo batapuak sabalah tangan. Dek ulah tapadayo dek rayuan angin sarugo si Ari ko, Melisa ampia se masuak parangkeknyo.

Ba-a dek ka indak. Kilaki nan banamo Ari ko alah acok mam buruak an si Rido. Padohal, dak diburuak an juo, Rido ko alah cukuik buruak. Di muko Melisa nyo manih pi kutiko dilakang Melisa nyo ma ancam. Ma ancam Rido ntuak manyontohan sagalo pr nan diagiah dek guru. Rido ko di ancam kalau masih nio bakawan jo Melisa agiah tunjuak an nyo PR.

Indak sampai hati si Rido ka Melisa. Dituruik an juo lah kandak si Ari ko demi cintonyo ka Melisa. Satiok ado pr dari guru, Rido nan ma agiah contoh ka Ari sampai nilai rapor si Ari ko rancak bana.

Awalnyo Melisa ko simpatik mancaliak nilai Ari nan tinggi-tinggi. Bararti Ari ko alah mulai barubah. Biasonyo nilainyo paliang buruk di lokal ko.

Dek karano Ari lah barubah, Melisa ko mulai picayo. Ado raso bangga Melisa ka Ari katiko malieknyo. Ari ko mulai mandakek ka Melisa.

Dek Ado pirasaik nan indak lamak ta idu dek Melisa. Salamo ko Rido indak pernah indak mangumpuan tugas do. Jikok ditanyo dek guru, Rido manjawek tugas tu tingga di rumah karano indak takana mamasuakan ka dalam tas.

Melisa mulai tambah curiga, ba-a kok samo lo kasusnyo jo Ari. Samo-samo indak mangumpuan tugas. Sak sangko Melisa ko tajawek dek kawan Melisa nan mangadu kalau tugas Rido ko tingga di rumah Ari.

Rido manyalangan tugas ka Ari hanyo dek karano nio mandapek an nilai rancak. Supayo Melisa simpatik ka Ari. Kironyo tabongka juo sadonyo kalakuan si Ari salamo ko.

Babilang maso baganti musim. Samanjak itu lah, Melisa mamiliah Rido untuk manjadi polenyo. Demi bakawan jo Melisa, Rido rela manuruik parintah si Ari nan kurang aja ko.

Rido nan lahia dari anak patani lado. Urang gaeknyo bakarajo sabagai patani lado. Satiok pulang sakola, Rido manolongan apaknyo di ladang. Mulai dari mambibik an lado, mamupuaknyo, manyemprot jo racun ulek nan ado di lado sampai mamatiak lado nan ka di jua ka pasa.

Kadang-kadang ado guru nan mamasan langsung ka Rido. Ladonyo lamak indak padeh tu tahan lamo lo kalau disimpan di kulkas. Salah satu langganan rido ko Ibuk Pide nan ma aja bahaso Indonesia di sakolah tu a.

Walaupun Rido sibuk manolongan urang gaek nyo, tapi kalau masalah baraja indak pernah tingga do. Rido manjadi anak murik taladan di sakola tu. Rido sibuk juo di dalam kegiatan OSIS. Mendapek an juara umum di sakolanyo. Dek Rido gigiah tu lah nan mambuek Melisa jatuh cinto.

Kapandai an nyo jo sipaik suko manolong tu nan mambuek Melisa tagilo-gilo ka Rido. Apo lai Melisa urangnyo santiang lo. Samo-samo santiang dalam baraja. Jadi cocok bana lah nak rang baduo ko. 

Indak mamandang randah karajo urang tuo. Walaupun Melisa anak urang kayo nan punyo usaho gadang di kota tu. Tapi Melisa indak piliah-piliah dalam bagaua. Anaknyo elok baso, elok samo urang, santiang, pandai main basket, suko mam balanjo an kawannyo. Indak heran kalau banyak urang nan kanai hati ka Melisa.

Carito Singkek ko dibuek pakai ati dek Ibuk Fide Baraguma ari Kamih Malam, 10 Juni 2020 di Pasa Tobaghu, Dharmasraya, Sumatera Barat, Indonesia sasudah manggiliang lado untuak ka samba. 

Afriant Ishaq,

Afriant Ishaq

Penulis yang malas menulis. Suka menulis sesuatu yang beraroma pendidikan, remaja dan gaya hidup.

One Comment

  1. Ancak nian ma cikgu ….Bahaso Minang ko lah mulai tingga dek kaum remaja….semoga dengan carito dari ati fide kok tabukak pangana anak2 remaja manulih lai

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Back to top button